عندي قط وقطة متربيين مع بعض من وهما صغيرين ومتعودين ع بعض ودلوقتي عمرهم سنة ونص والقطة بقالها شهر والدة .. بس تصرفاتها اتغيرت كتير عن قبل الولادة .. على طول جعاانة مهما أكلت و أي حد يروح ع المطبخ تروح وراه وتفضل تنونو ، في البداية قولت انها جعانة عشان بترضع وبالذات ان هي طول عمرها اساسا أكلتها خفيفة لكن من بعد الولادة وهي مبتشبعش، وفي كذا أكله كانت بتحبها زي البطاطس المهروسة مثلا .. مبقتش ترضى تاكلها غير اما متلاقيش قدامها غيرها ومن ساعة ما ولدت وهي مبترضاش تقعد جنب عيالها او ترضعهم غير بالعافية أو ساعات قليلة كانت بتيجي تقعد جنبهم .. في البداية كانت تسمع صوتهم تيجيلهم دلوقتي بقت تيجي تبص عليهم وتسيبهم وتمشى وساعات مبتجيش كانت ف البداية والدة ف كارتونة ومحطوطة ف مكان متداري عشان هي متضايقش .. لكن لاقيتها بالعكس عيزاهم برا ومبتقعدش معاهم غير أما نطلعهم على السرير بنفسنا لأن هي مبتعرفش تمسكهم وأوقات كتير بتنونو بصوت مكتوم مع انها عادي بتنونو بصوت عالي برضو .. بس دايما تنونو بصوت مكتوم وكتير ومببقاش عارفة هي عايزة ايه! أما القط بقى من ساعة ما طلب جواز وهو مش مبطل مع انه اتجوز كذا مرة .. وطول ما هي حامل كان عايز يتجوزها وهي كانت ساعات بتبعده وساعات لأ لأنهم كانوا متعودين على بعض وهي مش بتضربه، فكنت أنا اللي ببعده .. ولسة لحد دلوقتي طالب جواز بس هي أوقات بترضبه وأوقات أنا برضو أبعده لأني خايفة هي تطلب جواز وتسيب عيالها خالص .. وللأسف مش هقدر أمشي القط لأن القطة مبتعرفش تقعد لوحدها أبدا ودايما بتدور عليه لو اختفى شوية من قدامها هو كان بيقلق على القطط الصغيرة ومتعود عليهم ودايما بينضفهم .. ولو سمع صوتهم يجري يشوفهم ويقعد جنبهم حتى لو ع السرير رغم انه مبيحبش يقعد ع السرير .. يعني هو بطبيعته حنين جدا عليهم يمكن أكتر من أمهم وبيخاف عليهم جدا، بس فجأة النهاردة مسكهم من رقبتهم جامد لدرجة إن القطط الصغير نونوت جامد .. وبعدته بالعافية عنهم وهو برضو مصمم يمسكهم .. أنا خرجته برا المكان اللي هما فيه وهو مصمم برضو أنه يدخلهم! هل هو كدة عايز يتجوزهم ولا خايف منهم ولا خايف عليهم ولا ايه بالظبط ؟ انا مش فاهمة سلوك الاتنين ومش عارفة اتصرف معاهم ازاي وخايفة على الصغيرين منهم لأنهم حتى لسة مبيشربوش مياه ولسة متعلمين المشي .. ومش عارفة اتصرف ازاي معاهم