By Zoorest Admin ( Category - قطط)
كام مره سمعت ان القطط بتجيب عقم؟
و كام مره خُفت علي "اختك ، خطيبتك ، مراتك" بسبب الموضوع ده؟
هنتكلم النهارده عن الموضوع ده و نوضح كام نقطه .
اولا نفهم ايه الموضوع ده .
مرض "البنات" التوكسوبلازما "Toxoplasmosis"
هو عباره عن مرض يصيب الانسان عن طريق طفيل يدعى تكسوبلازما.
طيب المرض ده بيجي عن طريق القطط بس ؟
لا خالص . المرض ده ممكن يجي من اللحمه اللي مش مطبوخه كويس " اللانوشن و البلوبيف و كل ده"
لو حد بيقطع لحمه و بنفس السكينه قطع خياره مثلا . ممكن تجيب نفس المرض.
طيب ايه علاقه القطط بالموضوع ؟
القطط بتحمل المرض ده بسبب اكلها للحوم اللي مش مطبوخه كويس ، او التقصير في تطعيم القطط ، الاختلاط بقطط من الشارع .
المرض ده بيجي للبنات بس ؟
لا خالص المرض بيجي للبنات او الولاد .
هو المرض ده بيسبب العقم ؟
لا المرض ده مش بيسبب العقم خالص.
لا قدر الله لو موجود ف هو بيسبب اجهاض في الشهور الاخيره من الحمل ، او بيسبب تشوه في الاجنه.
المرض ده معدي؟
لا، المرض مش بيتنقل من انسان لانسان، بس بيتنقل من الام للجنين.
ايه الحل علشان اممن نفسي من المرض ده ؟
لازم نطعم القطط التطعيم السنوي بتاعها .
الحمام بتاعهم يتلم بجاروف و يترمي ، نغسل ادينا كويس.
بالنسبه للاكل يفضل ان اللحمه تشم النار قبل ما نأكلها للقطط . و اللبن لو من عند بتاع اللبن "مش معلب" يتسخن الاول.
بالنسبه للحوامل يفضل نعمل تحليل توكسوبلازما في فترات الحمل للاطمئنان مش اكتر ، و تبعد تماما عن تنضيف رمل القطط . او تلبس جوانتي و ترميه بعد كده
طيب لاقدر الله لو عملنا تحليل و لاقينا المرض ده موجود نعمل ايه ؟
الحل بيبقي بسيط جدا كورس مضاد حيوي زي كان عندك برد كده و الموضوع بيخلص.